PALUI bujur haja tamasuk urang nang pamandir, tapi apabila inya balum patuh atawa kada dimulai bapander maka ngalih mandangar inya babunyi. Makanya am sampai tuha umurnya hanyar bakulih bini, itu gin jaka kada dirujukakan ka muhanya.
Rancak haja pina sasengkeng-sengkeng tapi imbah dihimati urang lalu ja mundur kada sing bunyian. Macam-macamlah balum ada gawian tatap. Makanya bubuhannya kakawalannya mamadahakan Palui itu pamburisit wan bibinian tapi ada jua nang manyambatnya bancir.
Imbah disambati bancir inilah inya pina mulai baliur lawan bibinian. Abah umanya kada tahu wan parubahan Palui maka kada biasa lagi manawarinya atawa manyuruhnya babini. Sudah rancak Palui menyindir-nyindir tapi abah-umanya tatap kada paham.
“Uuu, bah, musim mangatam parak, haraga banih pina larang haja bah-ai,” ujar Palui manyindir.
“Syukur-am haraga larang, nyaman abah kawa manabung gasan naik haji,” ujar abahnya manjawab.
Rupanya nang abah kada paham wan sindirian Palui. Imbah itu, Palui mulai pulang mamaraki umanya, banyak nang dipanderakannya lalu paampihannya inya batakun lawan umanya
“Ma….. sapi kita itu barapa tahun umurnya?”
“Umurnya hanyar lima tahun tapi banar musti larang haraganya,” ujar umanya.
“Kalu kaya itu, ulun kawinakan sapi itu Ma-ai,” ujar Palui sambil manyindir.
“Hauu….. damintulah, kada tabaliklah Lui,” sahut umanya nang rupanya mulai paham wan sindiran anaknya.
“Nah…… mama ini lakas paham kada kaya abah,” sindir Palui pulang.
Akhirnya bulan Zulhijah imbah buka haji Palui dikawinakan wan pilihan abah umanya. Babiniannya kada urang lain, yaitu kamanakan mamarinanya jua.
Palui tahu haja pang wan babinian itu tapi inya kada patuh banar karana rumahnya bajauhan balainan kampung. Imbah dikawinakan Palui pina makin barajin ka pahumaan, kada tatinggal waktu sumbahyang. Tapi abah umanya pina curiga karana kada kalihatan inya pina basasayangan, kada kadangaran bagaya atawa bapapanderan. Kaya itu jua mulai malam pananambaian sampai baminggu-minggu kada talihat kaya urang hanyar kawin bila malam-malam rancak ka balakang ka jamban, piragah bakamih atawa batampungas padahal kada lain pada babasuh pakakas bakas bagawi.
“Ui….Lui ikam babaikan hajalah wan bini ikam itu,” ujar mamarinanya batakun disuruh umanya.
“Inggih baik banar, ulun sayang banar,” ujar Palui.
Wayah Palui laki bini kadada di rumah, abah wan umanya malihati kamar Palui, kalu pina mambawa banyu ba-ember ka kamar gasan babasuh. Tuhuk mancari ember atawa gayung, kada tadapat jua. Tapi bubuhannya takajut banar manamui handuk karas kaya kulit kambing badadai di higa ranjang.
Bubuhannya lalu bapikir, pantas haja rancak dihintip malam-malam pangantin hanyar ini kada biasa babasuh ka jamban atawa ka kakus. Rupanya Palui curiga jua dihitipakan, makanya inya kada babasuh lawan banyu tapi bapusut babarasih lawan handuk haja sampai-sampai handuknya mangaras kaya kulit kambing. (ivd/mht)
