HARI itu pambakal mangiyau Palui wan kakawalannya, marundingakan handak mamasang talipon. Karna kampung-kampung dihulu dan dihilirnya sudah mamasang talipon jua.
“Bubuhan ikam kutugasakan maurus mamasang talipon,” ujar pambakal manyuruh.
“Kami katuju banar pambakal ai karna wayahini sudah zaman kamajuan, jadi supan kampung kita kalu kada batalipon,” ujar Palui.
“Kaya apa haja caranya tasarah bubuhan ikam. Sual duit jangan dipikirakan karna pambakal siap mambantu,” ujar pambakal.
Lalu bubuhannya tulakan ka kantur talipon, batakun cara-cara mamasang talipon gasan kampungnya.
“Kami siap haja mambantu mamasangakan talipon di kampung sampiyan, asal haja dipanuhi syarat-syaratnya,” ujar patugas talipon.
“Napa syaratnya?” ujar Palui.
“Syaratnya kada ngalih, antara lain surat manyuratnya, maisi purmulir bamaterai wan biaya pamasangan,” ujar patugas.
“Kalu cuma itu syaratnya bujur kada ngalih, makanya kami siap minta dipasangakan,” ujar Garbus.
“Tapi sabalum kami manyambungakan ada lagi syarat lainnya, makanya harus kami cek dahulu. Kami handak mancek apakah di sana sudah ada tihang taliponnya. Kalu balum ada tihang taliponnya maka harus ditajak dahulu tihang-tihangnya. Karna andaknya jauh maka kami harus manyadiakan ratusan tihang,” ujar patugas.
“Di kampung kami itu sama sakali balum ada nang baisi talipon makanya kami inilah nang mandahuluinya,” ujar Garbus.
“Karna andak kampung sampiyan ini jauh matan jalan utama, masuk kampung maka tapaksa talawas mamasangnya,” ujar patugas.
“Sabujurnya kada usah ngalih-ngalih ma-adaakan tihang- tihangnya karna di kampung kami itu sudah banyak tihang-tihang nang kawa dijadiakan tihang talipon, bahkan ganal-ganal labih ganal pada tihang talipon nang ada ini,” ujar Palui.
“Balum ada tihang-tihangnya Lui ai …,” ujar Garbus umpat manyahut karna inya sama sakali kada biasa malihat ada tihang talipon di kampungnya.
“Kalu balum ada tihang taliponnya tapaksa kita sadiakan dahulu, mungkin lima anam bulan hanyar kawa dipasang talinya. Di mana dan napa ngaran kampung sampiyan itu,” ujar patugas batakun.
“Sabujurnya banyak nang handak mamasang talipon ini, biarpun balum ada tihangnya tapi kawa haja diakali. Kampung kami bangaran Batangkulur, kawa haja batangnya dipasangi tali talipon. Jambu dan ada lagi nang ganal wan kuat-kuatnya yaitu ulin wan binjai,” ujar Palui manyambati puhun-puhun nang ganal gasan mamasang tali talipon.
“Ayu ja kami pikirakan,” ujar patugas karna kada kawa lagi malawani panderan bubuhannya. (emhati/rep)
