MATAN halus Palui umpat mamarinanya karna abah umaku hidupnya sakit, apalagi Palui sapadidangsanakan sampai balusin-lusin. Lalu imbah ganal kawa kawin karna diraih urang karna kacalakaan sampai wayah ini inya umpat badiam dan makan nginum dijamin mintuha.
Untung haja Palui dikatujui ulih pambakal lalu inya dibawai mahunur di kantur sidin, biar cuma jadi pambantu pambakal alias pasuruh sidin.
“Samunyaan itu sudah ada nang maaturnya. Sasakitnya kita hidup di kampung insya Allah kada cagar mati kalaparan,” ujar Palui pina mahibur diri.
“Kami himung banar ikam tamasuk nang bahasil,” ujar Garbus.
“Hi-ih, ikam sudah bagawi di kantur pambakal,” ujar Tulamak manambahi.
“Alhamdulilah, umpat mahunur harian lapas,” ujar Palui.
“Itu artinya ikam cagar jadi bacapeg,” ujar Garbus.
“Bacapeg itu napa Bus?” ujar Tulamak.
“Bacapeg itu adalah bakal calun pagawai, jadi masih talu langkah lagi hanyar sampai, wayahini hunur, lalu jadi bakal, lalu ujian, lalu cagar jadi calun,” ujar Palui manarangakan.
“Ooooo… jadi kalu kaya itu ikam tinggal mahadangi SK haja,” ujar Garbus.
“Doakanlah kakawalan mudahan tacapai cita-citaku jadi PNS,” ujar Palui pina musti.
“Kalu jadi pagawai, kira-kira napa pangkat ikam?” ujar Tulamak.
“Nang panting kada pangkatnya tapi haratnya,” ujar Palui lihum sambil bakacak pinggang.
“Sudahlah ikam mamajuakan lamarannya gasan diangkat jadi pagawai,” ujar Garbus.
“Samunyaan sudah kujulung wan pambakal, jadi aku tinggal mahadangi SK-nya haja,” ujar Palui.
“Umur ikam wayahini barapa tahun Lui?” ujar Garbus.
“Parak 50 tahun,” sahut Palui sambil kuhuk-kuhuk batuk.
“Ijazah napa nang ikam umpatakan Lui?” ujar Garbus.
“Ijazah kejar paket A dan ijazah mangatik sapuluh jari. Karna samunyaan syarat itu
sudah kupanuhi maka aku disuruh mahadangi SK-nya,” ujar Palui.
“Sudah barapa tahun ikam mahadangi SK itu Lui?” ujar Garbus mahimati karna inya
tahu bahwa Palui kada mungkin diangkat jadi PNS karna umurnya sudah tuha, bapanyakit batukan dan ijazahnya cuma sadarajat SD.
“Aku mahadangi SK itu Bus ai sudah parak lima balas tahun,” ujar Palui pina sadih.
“Salamat mahadangi SK sapuluh tahun lagi, mudahan kada SK Tuhan nang datang,” ujar Tulamak mahuhulut. (ivd/mht/rep)
