Palui tapilih pulang manjadi katua RT. Padahal inya sudah parnah manjabat, tapi karna urang banyak nang katuju tarutama bubuhan pamudanya, jadi tapakai pulang. Palui urangnya pangawal wan jua saraba rasuk wan urang kampung, baik nang tuha atau pun nang anum.
Kalu handak jadi pajabat harus baisian bini. Artinya supaya kada layau ka hulu ka hilir karna sudah ada wadahnya. Tapi bila kada baisian bini maka tapaksa makan nasi bungkus, artinya imbah dimakan maka daunnya kada dipakai lagi lalu dibuang, ujar Palui.
Ikam ini Lui ai talalu banyak baisian istilah wan andai-maandai. Sual daun dibuang atawa tabulik butul imbah dipakai, sabujurnya kawa haja diakali. Nyatanya, banyak haja urang nang sudah babini, masih haja katuju baulanja di luar bahkan basalingkuh, ujar Tulamak.
Karna banyak nang katuju baulanja di luar itulah maka bahamburan itik-itiknya, ngalih dibarantas, ujar Palui.
Ooo… kalu kaya itu aku akur Lui ai bahwa pajabat itu harus babini, ujar Garbus.
Makanya, mulai tadi kusambat bahwa pajabat itu parlu pandamping. wan, pandamping itu adalah bini, sahut Palui.
Ooo… pantas haja imbah dilantik jadi katua RT dahulu, bini Palui kada mau tapisah wan lakinya. Ibarat paribahasa di mana ada gula di situ ada samut, di mana ada Palui, pasti di situ ada bininya, ujar Tulamak.
Karna salalu didampingi bininya itulah maka Palui jadi alim banar kaya siput dipais, ujar Garbus.
Aku kada cuma mandampingi lakiku karna inya jadi katua RT, ujar bini Palui nang hanyar datang umpat manyahut karna kada tahan disindir Garbus.
Kalu kada karna kaharusan mandampingi laki sabagai katua RT lalu karna napaaa? ujar Tulamak manggasak.
Aku harus mairingi lakiku kamana pun inya tulak karna dalam KTP kartu tanda panduduk-ku tatulis bahwa pakarjaanku adalah ikut suami, makanya ka mana-mana lakiku tulak harus ku umpati, ujar bini Palui kada hakun kalah.
Kami paham, kami paham bini Palui ai. Supaya ikam di higa Palui kalihatan pina bapangaruh sabagai bini pajabat maka jangan kada ingat mamasang kacamata hirangnya wan lihum sadikit, jangan marangut, ujar Garbus mahuhulut.
