Sudah parak ampat tahun Palui balaki babini, hanyar haja mandapat anak. Inya basyukur banar karna anak itu lalakian sasuai wan kainginannya. Ngarannya Si Pulai wayahini umurnya sakitar lima tahun, jadi wayah raramiannya bagaya, makanya inya disayangi banar. Siang malam kada kawa tapisah wan abah umanya.
“Ui umanya, tapaksa ai kita bagantian manjaga anak karna ading ikam bulik ka kampung,” ujar Palui.
“Akur haja abahnya ai, asal kita bajanji bagantian hari, sahut bininya. Hari ini giliran abahnya mahimpu karna aku handak ka pahumaan,” ujar bininya lalu langsung tulak.
Palui tamasuk panyayangan wan anak, kaya itu jua anaknya kada kawa tapisah wan uma abahnya. Palui mambarasihi sapida, anaknya umpat baipang dibalukuk, kaya itu jua wayah Palui manyapu halaman nang anak minta diumbah. Sampai Palui mancibuk banyu di sumur lalu batatapas, nang anak tatap kada hakun balapas.
“Lai… ikam duduklah satumat di sini, abah handak mandi ka kamar mandi,” ujar Palui mambujuki anaknya. Tapi anaknya marunca-runca indah ditinggal saurangan di luar, lalu tapaksa dibawa Palui masuk ka kamar mandi. Karna handak lakas tuntung maka Palui langsung batilanjang langsung bakubui banyu. Nang anak kilip-kilip matanya malihati abahnya mandi batilanjang.
Kada lawas datang umanya, lalu Palui manyuruh baganti manjagai Si Pula karna inya handak manukar timbaku ka warung.
“Nak,” ujar umanya. “Ikam duduklah satumat aku handak mandi karna bapaluh banar bakas datang bagawian di pahumaan,” ujarnya.
Sama kaya Palui tadi, nang anak kada hakun jua ditinggal saurangan karna takutan kadada nang manungguinya. Lalu umanya tapaksa jua mambawanya masuk ka kamar mandi. Langsung bapacul baju wan tapih, lalu bui….bui….. bakubui. Imbah Palui datang langsung batakun wan bininya:
“Wah, nyamanlah, sigar awak habis tuntung mandi,” ujar Palui marawa bininya nang lagi mambujurakan tapih.
“Ininah anak sampiyan ungah banar kada hakun ditinggalakan lalu kubawa ai masuk ka kamar mandi,” ujar bininya.
“Haauuuww….. sama wan aku, tadi kubawa jua masuk ka kamar mandi,” sahut Palui.
Nang anak papalingau mandangar abah umanya bapander mambawa inya masuk ka kamar mandi, lalu baucap: “abah…… abah…… abah jagau, mama…..mama……kada jagau,” ujarnya sambil bauju.
“Kanapa nak maka abah dipadahakan jagau dan mama kada jagau,” ujar Palui manakuni anaknya.
“Ulun itihi bahimat tadi abah bataji tapi mama kadada tajinya, ujar si Pulai sambil manunjuk Palui.
“Naahhhh……paham kalu umanya, abahnya Pulai jagau, abah Pulai bataji, makanya jangan hiran kalu abah pambintihan karna gatal taji, ujar Palui mangalakak tatawa saurangan.
