Wayah Surawin handak ka kalurahan inya batamuan wan Palui nang taungut saurangan di gardu. Surawin tapaksa bamandak karna malihat Palui kalihatan sadih, nangkaya urang nang banyak pikiran.
“Kanapa Lui ikam maka taungut saurangan, napa nang dipikirakan?” ujar Surawin managur Palui.
“Aku sadih banar Win ai. Biniku muar wan aku. Inya kada hakun lagi aku kumpuli,” ujar Palui.
“Hau napa sababnya? Ikam pasti baulah salah atau sudah manyaleweng,” ujar Surawin.
“Samunyaan itu karna si Desi,” ujar Palui sadih.
“Nah bujur kalo tatangguhanku, ikam basalingkuh wan bibinian nang bangaran si Desi,” ujar Surawin.
“Nang paling maulah aku sadih, aku dipadahakan sudah kada waras lagi,” ujar Palui.
“Aku satuju wan inya, ikam pasti sudah kada waras bila mandua-akannya. Amun malihat bini ikam urangnya bungas, rajin baibadah wan panurut wan laki, pasti si Desi itu labih langkar daripada bini ikam maka ikam hakun jua basalingkuh wan inya,” ujar Surawin pulang.
“Sabujurnya si Desi itu lain ngaran bibinian tapi ngaran sapiku Win ai,” ujar Palui manarangakan.
“Amun si Desi itu ngaran sapi ikam, kanapa bini ikam sarik?” ujar Surawin handak tahu.
“Ngalih aku mangesahakannya Win ai, ikam pasti kaina mahuhulut aku,” ujar Palui sedih.
“Ayu ja ikam parcaya haja, aku bajanji kada mahuluti,” ujar Surawin bajanji.
“Mulanya nang kaya ini…” ujar Palui mulai bakisah.
“Bamula wan biniku nang handak banar maminum susu. Daripada manukar susu belek atau susu bubuk nang haraganya larang, labih baik susu murni matan sapi saurang. Salain murah wan jua labih sehat. Lalu tulak ai aku ka kandang si Desi sambil mambawa ember wan dadampar. Paharatan dua talu kali ku parah si Desi bagagah banar. Daripada tahamburan susunya, maka aku ikat batisnya. Partama batis sabalah mukanya nang aku ikat. Karna kadada baisian tali maka aku ikatakan wan tapihku haja. Sakalinya masih haja inya bagagah kada hakun diparah, maka aku ikat pulang batis nang balakang,” ujar Palui bakisah panjang libar.
“Lalu napa hubungannya wan bini ikam nang manyanyarik itu?” ujar Surawin panasaran.
“Nah, di situ salahnya. Wayah aku handak maikat batis nang balakang, karna kadada baisian tali atau banda nang kawa gasan maikat, maka aku cabut haja tali salawarku. Karna kada batali maka salawarku tabalului lalu talihat ampunku antui-antui. Pas haratan tabalului itulah biniku masuk ka kandang. Lalu inya kukuciak manyanyarik. Dipadahakannya aku sudah kada waras lagi karna mamalar si Desi. Karna itulah inya kada mau aku kumpuli lagi,” ujar Palui sadih.
“Ha…ha…ha…!” ujar Surawin tatawa nyaring banar sambil baguling-guling kada tahan mandangar kisah sadih Palui.
“Nah bujur kalo, dihuhulutnya jua sakalinya,” ujar Palui makin marista.
