Kucing Makan Tikus
Palui wan Garbus rupanya indah supan wan kakanakan wayah ini nang sakulah tinggi-tinggi, sadangkan bubuhannya badua SD gin kada lulus. Ulih itu wayah kalurahan mandiriakan prugram ‘Kejar Paket A’ alias kalumpuk balajar Paket A bubuhannya badua lalu umpatan.
“Kita ini bujur haja kada tamat sakulah tapi rasanya kada kalah wan bubuhan pagawai kalurahan itu.”
“Hau, kanapa maka ikam baucap kaya itu Lui?” ujar Garbus.
“Samalam aku ditawari ulih bubuhannnya supaya masuk sakulah ‘Kejar Paket A’ di kalurahan,” ujar Palui.
“Bujur Lui-ai, ikam kada cucuk sakulah di Paket A. Nang cucuk ikam ini kuliah di Paket D,” sahut Garbus.
“Aku kada tahu bapapaketan dan bakekejaran, tapi nang panting bisa mambaca wan kada kawa dibunguli urang,” balas Palui.
“Aku tapaksa umpat Lui ai karna imbah tuntung umpat paket ini dapat surat tamat SD,” ujar Garbus himung.
Napa nang maulah ikam himung Bus?” Palui batakun.
“Nang maulah aku himung dan rajin umpat balajar karna guru-gurunya bibinian, anum-anum dan langkar-langkar. Karna gurunya anum wan langkar itulah maka aku rajin maitihi sidin ma-ajar,” ujar Garbus.
“Ikam itu sabujurnya kada mata karanjang lagi Bus-ai, tapi karanjangnya. Baisian anak sudah talu ikung bapadah bujang tarus,” ujar Palui.
“Kada salah aku kalu, tampulu payu wan urang handak, masuk kada papa kalu?” ujar Garbus.
“Ayu ikam ku-uji, kalu bujur-bujur balajar bisalah mambaca wan baulah kalimat,” ujar Palui.
“Pasti bisa asal jangan ngalih-ngalih,” ujar Garbus.
“Nah, susun kalimatnya dari kata-kata : kucing – tahi – tikus – makan,” ujar Palui.
“Gampang, sutil,” ujar Garbus.
“Dangarakan jawabanku: Tikus makan tahi kucing. Kucing makan tahi tikus. Tahi tikus makan kucing. Tahi kucing makan tikus,” ujar Garbus kumat-kumit mambulak-balik susunan kata-kata itu.
“Ayu Garbus tamatan paket A, manyusun kalimat haja tapuntal-puntal.
Saumur hidupku balum biasa mandangar: kucing makan tahi tikus atawa tikus makan tahi kucing apalagi tahi kucing makan tikus wan tahi tikus makan kucing,” ujar Palui mangalakak tatawa mahuhulut Garbus.
“Eee… sakalinya ngalihlah Lui?” ujar Garbus.
“Makanya sakulah itu jangan hanya maitihi muha lawan burit guru haja,” ujar Palui.
“Lalu kaya jawaban nang bujur Lui?” ujar Garbus handak banar tahu karna samunyaan jawabannya disalahakan Palui.
“Jawaban nang bujur Bus-ai adalah: Kucing makan tikus,” ujar Palui.
“Lalu dimana ma-andak ‘tahinya’,” Garbus batakun.
“Tahinya itu badudi, hadangi sahari atawa dua hari pasti kucing itu bahira mangaluarakan tahi,” ujar Palui baampik kasukaan karna kawa mangalahakan kawalnya itu.
