Kisah Palui dan Tulangan Wara
Kada nangkaya tahun sabalumnya, tahun ini di RT wadah Palui sadikit haja nang bakurban. Kalu dahulu bisa sampai anam tujuh ikung sapi, tapi tahun ini tiga ikung sapi wan dua ikung kambing haja.
“Maklum haja Bus ai, tahun ini takana tahun sakit, pahumaan rusak kakaringan makanya warga kita kada kawa umpat bakurban sapi atawa kambing,” ujar Palui.
“Ayu ja kita kada kawa umpat bakurban sapi atawa binatang, tapi hari-hari sudah bakurban parasaan,” ujar Garbus.
“Kalu bakurban parasaan itu sudah lawas Bus ai, dibunguli urang, dikaramputi urang,” ujar Palui.
“Hau kanapa maka ikam pina cacarancang bapander manyambat dibunguli urang Lui?” ujar Garbus.
“Dahulu macam-macam janji, ada jaminan wan bantuan gasan kasalamatan susial, bantuan gasan pandidikan, jaminan gasan kasihatan, macam-macam tapi kadada nang sampainya ka wadah kita ini,” ujar Palui.
“Nang ikam pander itu urusan pamarintah Lui ai, kalu sual bakurban di hari raya idul Adha ini urusan kita saurang, urusan masyarakat,” ujar Tulamak umpat manyahut.
“Aku paham haja Mak ai, kalu urusan bakurban ini aku sudah jua dapat kuponnya, dibari panitia sapuluh lambar,” ujar Palui.
“Kanapa banyaknya maka sapuluh lambar, kami dapat salambar haja,” ujar Garbus.
“Panitia nang mambari Bus ai, tiap ikung salambar. Karna kaluargaku sapuluh ikung, biniku, anakku anam ikung, kamanakan, mintuha wan aku, makanya dapat sapuluh lambar,” ujar Palui.
Wayah siangnya panitia mambagi daging kurbannya, tiap kupon dapat sabungkus, Palui umpat jua antri.
“Barapa kupon ikam Lui, maka banyak banar?” ujar panitia.
“Sapuluh,” sahut Palui.
Lalu panitia mamariksa kupon Palui dan takajut karna kupon Palui kartas fotokopian. Karna panitia indah galu maka dirundingangkan wan diputusakan bahwa Palui dibari sapuluh bungkus.
Imbah manarima, Palui bagagas bulik kahimungan, langsung manyuruh bininya mamasaki diulah masak habang, diulah karih, rawun, di sate dan labihannya dijamur.
“Jangan macam-macam kahandak masakannya abahnya ai. Nang paling cucuk samunyaan ini di sup tulangan haja, tahan gasan talu minggu,” ujar bininya.
“Hau, kanapa maka di sup tulangan haja?” ujar Palui hiran.
“Nang dagingnya sabungkus haja abahnya ai, nang sambilan bungkus lainnya samunyaan tulang, tulang iga, tulang dada, tulang batis wan tulang gulu,” ujar bininya malihatakan bungkusannya.
“Kurban parasaan pulang aku umanya ai,” ujar Palui manyasal mangaramputi panitia wan bon palsu.
