WARUNG bini Palui bujur haja halus, tapi cukup haja gasan manapal kabutuhan sahari-hari amun Palui kada dapat paruyek batukang. Saking raminya maka baistilah bubuhan kakawalan Palui kaya Garbus wan Tulamak baulah pangkalan gasan maojek baparakan wan warungnya Palui itu.
“Hanyar haja aku kaganangan umanya ai. Sudahlah ikam batatukar ka pasar? Tampulu ada bubuhannya kalu handak minta antarakan.” ujar Palui sambil manunjuk Garbus wan Tulamak nang lagi mahadang tumpangan.
“Astaghfirullah. Kada ingat sama sakali ulun, abahnya ai,” jawab nang bini.
“Hakunlah pian haja nang batatukar ka pasar? Ulun masih haur pang.”
Palui akur haja, lalu inya basiap-siap handak ka pasar gasan batatukar kaparluan bininya bawarung. “Siapa nah nang maantarakan aku ka pasar?” uajr Palui manakuni bubuhannya.
“Aku satumat haja batatukar. Jadi hadangi satumat di pasar kaina.”
“Lawan Garbus haja gin, Lui ai. Aku masih handak santai dulu,” sahut Tulamak. Garbus langsung badiri. Lalu bajalan tuju ka sapida muturnya.
“Barapa tambangnya bulang-bulik, Bus?” ujar Palui sambil bajalan bairingan lawan Garbus.
“Dua puluh ribu haja gin, Lui ai, lawan papadaan pang,” jawab Garbus sambil maambil ka hilim. Palui kada manyahut, tanda inya akur. Lalu babuat dibalakang Garbus. Langsung buhannya tulakan. Kada sampai sajam, datang sudah Garbus wan Palui matan pasar.
Imbah turun pada sapida mutur, Palui manjulung duit sapuluh ribuan lawan Garbus. Malihat duit jujulungan Palui masam muha Garbus.
“Tambangnya dua puluh ribu, Lui ai. Jadi masih kurang sapuluh ribu lagi.”
Lihum Palui mandangar, lalu inya manjalasakan, “Mulai tulak tadi, sampai datang ka sini pulang, kita badua haja kalu bakandaraan?”
“Hi ih,” lakas Garbus manjawab.
“Aku di muka, ikam di balakang,” ujarnya lagi kada mau kalah.
“Supaya adil, tambangnya kita bacatuk saparu saurang, Bus ai. Aku sapuluh ribu, ikam sapuluh ribu. Lain jakanya aku bakandaraan saurangan, hanyar aku hakun bayar dua puluh ribu,” ujar Palui sambil maninggalakan Garbus nang masih tanganga kada paham.
Tulamak wan bini Palui kulikikan katawa malihat Garbus pina tahinip di kandaraannya. (rep)
