Kisah Palui Baingkut di Pagar
Kai Palui baumur dalapan puluh labih tapi masih sihat haja. Tapi ngarannya urang tuha, imbah anu pina mangalilu wan gagaringan, kada kawa kana angin.
Kada lawas tadi sidin kuhul-kuhul batuk kada sing ampihan. Ujar anak-cucu sidin sabaiknya kayi dibawa ka dokter. Imbah bakumpulan duit, tatinggal Palui mandapat tugas mambawa sidin ka dokter.
“Aku kada handak naik sapida motor, aku handak babica haja,” ujar sidin bakaras sambil tabatuk-batuk.
“Kada apa-apa kayi ai. Amun babica kajauhan, kasihan tukang bicanya,” ujar Palui.
“Pokoknya aku kada handak. Ikam tahu saurang kalo jalanan wayah ini bilang galu banar, apalagi sapida motor ikam itu buruk wan rancak mogok,” ujar kayinya.
“Asal pian pisit bapingkut, insyaallah kada apa-apa. Pian parcaya haja wan ulun, karna ulun ini sudah lihai bakandaraan,” ujar Palui manjalasakan.
“Sapida motor ulun sudah kada buruk lagi kayi ai, sudah ulun hurupakan kuncinya,” ujar Palui manunjuk ka sapida motor nang hanyar dikariditnya.
Akhirnya Kayi Palui hakun jua diantar basapida motor, imbah sidin malihat sapida motor ampun Palui nang hanyar.
“Ayu kayi babuat, jangan kada ingat baingkut kuat-kuat,” ujar Palui sudah dimuka pagar mahadangi kayinya banaik.
“Hi-ih, ini nah sudah handak babuat,” ujar kayinya sambil manggitir naik ka lapak sapida motor.
“Jangan kada ingat baingkut pisit-pisit kayi lah,” ujar Palui maingatakan pulang.
“H-ih, ini nah kayi sudah baingkut pisit,” ujar kayinya.
“Ayu ja kalo kaya itu,” ujar Palui sambil mang-gas sapida motornya.
Kada lawas, sakalinya tadangar bunyi mandabuk nangkaya ada nang gugur, Bruakkkkk!. Palui takajut lalu inya manuleh ka balakang. Sakalinya kayinya Palui nang tagugur. Palui tapaksa bamandak, lalu inya babulik manyasah. Untung kada lawas kayinya kawa babangun.
“Nah iya kalo,” ujar kayinya bamamai. “Hanyar haja jalan sudah nangkaya ini,” ujarnya kasakitan.
“Pian kada apa-apa kah kayi?” “Kanapa pian jadi tagugur, pian kada bapingkut kah tadi?” ujar Palui manakuni.
“Sudah jua. Sudah jua aku baingkut, malah pisit banar,” ujar kayinya.
“Kanapa jadi tagugur jua, dimana garang pian bapingkut?” ujar Palui hiran.
“Waktu naik, kayi baingkut di pagar. Karna ujar ikam supaya baingkut, jadi kayi baingkut haja karas-karas di pagar,” ujar kayinya.
“Ngalih jua baisi kayi antik ini. Maksud ulun pian baingkut pisit wan ulun atau baingkut di kandaraan. Jangan baingkut di pagar, kaya apa haja pian pisitnya tatap haja gugur,” ujar Palui manawaakan kalakuan kayinya.
