Wayah jadi makelar sapida wan sapida mutur, Palui banyak bahujung karna bisa mahitung haraga. Cuntuhnya, sapida mutur buruk ditukarnya murah, lalu dibaikinya, dicat ditambahinya lampu hingga mangkilat, Haraganya dua kali lipat.
Lui, aku mandangar habar ada urang handak bajual sapida mutur nang masih hanyar karna inya parlu duit. Tapi ujarnya labih baik lagi kalu tukar tambah wan sapida mutur nang taburuk sadikit, supaya inya tatap baisian kandaraan, ujar Garbus.
Kalu sapida mutur nang taburuk aku balum baisian karna sapida mutur nang kutukar samalam itu sudah payu, ujar Palui.
Di samping bahurup tukar tambah wan sasama sapida mutur, urang itu hakun jua tukar tambah wan sapida nang ikam pakai ini. Nang panting cucuk panderannya, ujar Garbus.
Siapa wan di mana urangnya Bus? Tulung kaina dibantu tawar manawar haraga tukar tambahnya, ujar Palui tatarik mandangar panderan Garbus.
Pukuknya kubantu sakakawaku, asal haja panderanku itu ada jua haraganya, sahut Garbus maharap dapat jua kumisinya. Lalu Palui wan Garbus mandatangi julak Ijap nang handak tukar tambah sapida mutur itu tadi.
Wah, sapida muturnya merek hanyar balum saribu kilometer, ujar Palui sambil mamusut-musut sapida mutur nang masih mangkilat ampun Julak Ijap.
Aku tapaksa tukar tambah karna parlu banar duit, wayah kutukar sapida mutur ini haraganya dua balas juta, balum lagi ungkus maisi, ujar julak Ijap.
Wayahini tukar tambah barapa haraga taksirannya Lak? ujar Garbus batakun.
Kita atur haja, kita rundingakan. Tukar tambah wan sapida ikam nang buruk ini gin aku hakun. Jangankan wan sapida buruk itu, tukar tambah wan cangkul nang ikam bawa ini gin aku hakun haja asal cucuk panderan, ujar julak Ijap.
Kira-kira barapa haraganya wan barapa tatambahannya, ujar Palui nang biasa tawar manawar dalam pambalijaan.
Tadi sudah kusambat bahwa sapida mutur ini kujual rugi, kutukar dua belas juta tapi gasan tukar tambah ini kuhargai sapuluh juta haja. Kalu tukar tambah wan sapida buruk ikam ini ditambah cangkul kawa haja dikurungi salawi ribu. Jadi ikam Lui ai manambah sapuluh juta dikurangi salawi ribu rupiah, ujar julak Ijap manaksir.
Jadi sapidaku merek ponik wan cangkul bamerek mata ulahan jerman ini diharagai salawi ribu? ujar Palui.
Ngarannya haja tukar tambah, aku dapat sapida buruk wan cangkul, ikam dapat sapida mutur hanyar, ujar julak Ijap.
Aku akur haja julak ai, tapi aku minta waktu satangah tahun, ujar Palui baulah alasan.
Tapintar sidin mahitung sakalinya, dianggapnya aku ini bungul pada cangkul, maharagai sapida wan cangkulku kamumurahan, ujar Palui dalam hati lalu bulik kada saling padahan.
