Si Garbus itu urangnya katuju banar manggawi kakawalan. Amun kada si Tulamak nang rancak manjadi kurban, bisa jua Tuhirang. Tapi kada jarang jua Palui umpat diwaluhinya.
“Pahit liur, pahit liur,” ujar Palui gagarunum.
“Kanapa maka ikam baucap kaya itu Lui, padahal ikam kulihat mahadapi teh susu. Kadada alasan kalu bapadah pahit liur,” ujar Garbus.
“Haraga barang sudah saraba larang Bus ai,” ujar Palui.
“Kalu barang saraba larang, maka batasi manukar saparlunya haja haja,” ujar Garbus.
“Bujur ujar ikam itu Bus ai, kalu baju salawar, barang pacah balah atawa makanan kawa haja bapilih tapi aku ini sudah kacanduan,” ujar Palui.
“Hau, apa ikam taumpat nginum ubat nang bamamaukan itu, maka sampai kacanduan?” ujar Garbus.
“Tarus tarang haja aku kacanduan ruku Bus ai, sahari samalaman ini ruku isi 12 bilah itu sampai bubungkus-bungkus habis,” ujar Palui.
“Dihimat kawalah Lui?” ujar Garbus mausulakan.
“Kaya apa caranya Bus?” sahut Palui.
“Kalu biasanya sahari ikam baruku 12 bilah bila bahimat kawa saparunya haja 6 bilah,” ujar Garbus.
“Kada mungkin, bahimat kaya itulah nang mambuat liurku pahit,” ujar Palui.
“Caranya kaya ini Lui ai, ikam manukar ruku 6 bilah haja, lalu tiap bilah ditatak dua. Jadi nang ikam isap sapanggal-sapanggal,” ujar Garbus manyaranakan.
“Kada nyaman kalu sapanggal-sapanggal Bus ai karna aku sudah tabiasa sabatangan. Pukuknya bila sabatangan pasti sadaappp…,” ujar Palui pina kanyamanan.
“Wayahini barapa haraga ruku sabungkus Lui?” ujar Garbus.
“Harat banar kalu ikam batakun haraga ruku, apakah ikam handak manukarakan aku? Sabungkus ruku haraganya Rp 7.000,” ujar Palui.
“Kalu kaya itu, ambil sabungkus ruku di warung acil Isul itu kaina aku mambayarinya,” ujar Garbus.
Mandangar si Garbus handak manukarakan ruku sabungkusan maka Palui langsung bukah ka warung acil Isul lalu maambil sabungkus ruku, lalu babulik sambil malihatakan rukunya ka Garbus.
“Ini nah duitnya,” ujar Garbus manjulung.
“Kanapa maka ikam manjulung duit saribu haja?” ujar Palui.
“Ikam manukar sabungkusan kalu, cukup gasan sahari samalaman,” ujar Garbus.
“Saribu kada cukup Bus ai, haraganya Rp 7.000,” ujar Palui.
“Aku mambari saribu haja, ikam manapali kakurangannya,” ujar Garbus langsung bajauh.
“Dasar Garbus, katuju manggawi kawal,” ujar palui kakalahan.
