Satiap malam buhan Palui bagadangan di pos kamling sambil manuntun tipi, sambil jua marunda kampung. Bila acara tipi pina kada rami, buhannya pasti badum atawa bacatur. Malam itu tabarungan di tipi rami mangisahakan kasus pambunuhan mutilasi.
“Wayah ini Lui lah, urang mambunuh supaya kada katahuan, awaknya dipanggal-panggal,” ujar Tulamak gagarunum sambil malihat ka tipi.
“Matan bahari sudah ada kajadian kaya itu. Ingatlah buhan ikam kisah mayau di kampung kita bahari? nah.. itu tamasuk mutilasi jua mamanggal kapala kakanakan,” ujar Palui mangisahakan
“Amun mambayangakan kapala panggal kaya itu, rasa marinding bulu awakku,” ujar Garbus pina takutan
“Ikam dasar pangincut Bus ai matan bahari pohon bagoyang haja ikam bukah mancicing ka rumah,” ujar Tulamak manumpalak Garbus
“Sama haja lawan ikam Mak ai. Amun ikam takutan, saban kali bulik matan rumahku ikam pasti mahadangi imbaian. Bila kadada ikam gasak samalam-malamnya tu pang, sampai ada urang barunda liwat ampah rumah ikam,” ujar Garbus tatawa mambuka rahasia Tulamak.
“Kada usah bapander bahari, buhan ikam mandangarlah barapa malam ini kampung kita geger urang bajalan kada pakai kapala?” ujar Palui mamadahi
“Ikam dapat habar di mana Lui, ne jaman modern sudah,” ujar Garbus pina takutan.
“Aku ne mambuktiakan langsung Bus ai, batamu urangnya pas malam Jumat tadi, jam dua malam,” ujar Palui. “Ini nah parak jam dua ayu kita hintipakan pulang.”
“Kita bulikan, baimbaian haja,” ujar Garbus mulai takutan
“Aku badahulu maju, buhan ikam di balakangku,” ujar palui.
Mau kada mau buhannya hakun mahintipakan urang nang bajalan kada pakai kapala, pas jam dua malam liwat Julak Samsul nang tuha batapih sambil mambawa sintar wan kayu marunda.
“Tu urangnya nang bajalan kada pakai kapala,” ujar Palui manunjuk ka Julak Samsul
“Itu Julak Samsul Lui ai marunda, kadanya hantu pang,” ujar Tulamak ampih takutan
“Siapa nang mamadahi aku hantu,” ujar Julak Samsul mandangar matan jauh
“Pian dipadahi hantu oleh Palui, dipadahinya bajalan kada pakai kapala,” ujar Garbus mamadahi ka Julak Samsul
“Aku kada mamadahi hantu, aku mamadahi pian bajalan kada pakai kapala haja,” ujar Palui lihum surangan
“Aku ne bajalan pakai napa garang? pakai kapalakah atawa pakai batis?” ujar Julak Samsul manakuni Tulamak wan Garbus sambil mamacah rahasianya.
