Dalam manjalani hidup Palui baparinsip yang panting kadada parsualan. Inya kada bagaduh, adakah, kadadakah iwak di dapur, tatap haja tatawa.
“Bujur haja hidup nang paling nyaman itu kadada parsualan, Lui ai, tapi harus ditambah bahwa baras di padaringan hibak haja, iwak tinggal maunjun dan timbaku cukup,” sahut Garbus.
“Kalu kaya itu untuk sementara dapat kita simpulkan Bus ai bahwa hidup nang paling nyaman adalah umpat mintuha sugih,” ujar Palui manjawab sakananya.
“Balum tantu jua Lui ai,” ujar Garbus.
“Hidup umpat mintuha baik nang sugih ataupun kada sugih itu tabanyak makan hati daripada makan nyaman,” ujar Garbus.
Paharatan bubuhannya bapander bakakajutan datang Tulamak.
“Lui……… uiiii Lui, kamana ikam samalam bahaharian kada kalihatan wan kudatangi ka rumah ikam kadada jua,” ujar Tulamak pina mahingal bapander.
“Aku samalam saharian ka pasar, batutukar barang gasan warung biniku. Kanapa maka ikam pina bagagasakan, ada urusan napa wan aku?” ujar Palui.
“Kawal kita Tulamak ini pina musti haja, parsualan halus bisa jadi ganal,” ujar Garbus umpat manyalahakan Tulamak.
“Ini sual nasib kawal kita si Palui, ada parsualan dan panting banar,” ujar Tulamak makin mayakinkan.
“Ada sual napa Lui? Ikam hanyar haja bapander bahwa hidup nang paling nyaman itu kadada baisian parsualan tapi nyatanya Tulamak pina bagagasakan ada urusan panting wan ikam,” ujar Garbus handak tahu.
“Ada apa Mak maka ikam pina mamadahakan ada parsualan panting wan aku? Parsualan napa,” ujar Palui takajut-kajut.
“Baisukan samalam ada urang datang ka rumahku manakunakan rumah ikam tapi ikam kadada. Lalu siangnya ada pulang telepon ka rumah Katua RT nang manakunakan ikam. Kaya itu jua wayah kamariannya ada pulang nang mancari ikam,” ujar Tulamak.
“Siapa nang mancari dan manelepon aku itu?” ujar Palui.
“Ujar urang nang bapasan itu bahwa ikam baisukan isuk disuruh mahadap Hakim,” ujar Tulamak bakisah.
“Haw, kanapa maka ikam dikiyau Hakim Lui? Ada parsualan napa? Ini musti ada kasus,” ujar Garbus pina manggitir-gitir.
“Aku bingung jua Bus ai, rasanya aku kadada parsualan napa-napa wan siapa pun,” ujar Palui taumpat pina bingung.
“Urang itu bapasan Palui disuruh mandapati Hakim di kanturnya, ada urusan panting sual kapling tanah,” ujar Tulamak.
“Ha ha ha……..hahahaaa.- …..,” ujar Palui mangalakak tatawa saurangan.
“Ada urusan panting malah ikam tatawa kasukaan, napa?” ujar Garbus wan Tulamak taumpat makin bingung.
“Itu Hakim. Si Hakim, Abdul Hakim Pahuluan bakas kawan sakulahku dahulu, wayahini inya bajualan tanah kaplingan gasan parumahan,” ujar Palui.
