Imbah habis kawin, ada pulang panyakitnya, panyakit kabanyakan gula, nang ujar urang wayahini diabitis. Tapaksa ai inya baarit bamamakan.
Baarit bamamakan kadada masalah, ujar Palui, tapi nang jadi masalah adalah kadada nang dimakan.
Karna panyakitnya ini sudah diarit puluhan tahun maka ada pulang gangguan lainnya, kada kawa bakumpul lawan bini.
“Cuba pang bausaha batatamba,” ujar bininya.
“Sudah haja ka duktur babarapa kali, sudah banyak manabus ubat sampai tajual galang jam. Aku ini asa putus asa hidup, kadada nang bisa kunikmati di dunia ini,” ujar Palui menjawab sambil marista.
“Jangan kaya itu abahnya. Tawakkal-lah lawan Tuhan, ujar urang panyakit balum waras karana balum jodohnya, akarkah, dadaunankah atawa gatah-manggantah,” ujar bininya mambisai. Inya pina kasian banar malihat laki pusang siang malam.
Kakawalan Palui tahu banar panyakitnya nang sabuting ini makanya bubuhannya kada sampai hati mahuhulut Palui, malah umpat bausaha mancariakan tatambanya.
Ada nang manyuruh baurut, batimung, maandak kambang kalu pina kapuhunan, macam-macam ai usulannya.
“Lui, ini amun ikam parcaya, aku biasa dibari urang jamu ngangarannya jamu wani manggulak.
Apalagi nang samacam itu pasti kada mengaciwaakan. Jamu ini matan akar-akaran Kalimantan.
Tapi mudalnya harus parcaya lawan kada bulih dipakai ka urang lain salain muhrim sahnya.
“Napa haja saratnya, Insya Allah kuakuri asal kawa manyampaiyakan hajadku.
Kasihan biniku sudah tiga ampat tahun balaki babini balum jua asanya aku mambahagiakan inya,” ujar Palui.
Saban malam Palui manginum jamu wani manggulak barian Garbus, maamalakan baminggu batangah bulan. Imbah pina kuat wan yakin maka mulailah inya mamparaktikakannya.
“Alhamdulillah, bujur jua pambarian Garbus itu dasar manggulak,” ujar Palui dalam hati. Sampai-sampai bininya gin takajut nangapa tatamba Palui.
“Ui, tatamba nangapa pian untal pina waras bakajut, dasar manggulak abahnya ai,” ujar nang bini kasasayangan.
“Anu, umanya ai jamu barian Garbus ngarannya jamu wani manggulak. Ikam pang umanya pina tahan banar nangapa diuntal,” ujar Palui.
“Tapaksa ai aku bausaha jua supaya jangan kalah lawan ikam, aku manginum jamu balas dandam abahnya ai,” ujar nang bini sambil lihum.
“Kalu kaya itu lik satu-satu, ampih dua hingga tiga kusung kaya nang dahulu,” ujarnya taimbai badadua.
