Rupanya sakukuatnya awak bila kada diharagu bisa jua garing. Bubuhan Palui, Garbus, Tulamak, Tuhirang wayah lagi anum bujur- bujur manusia alam tahan bapanas wan bahujan. Maka itu kulitnya kalihatan kandal baminyak babalang suklat tuha.
Wayah bagawian dipahumaan baik musim batanam atawa musim mangatam bubuhannya tahan kada sing bajuan, hanya batupi purun gasan manahan panas atawa hujan. Imbah bagawian di pahumaan bulik ka rumah langsung haja mandi, kadada nang marasa uyuh atawa garing.
“Bus mana si Palui? Aku babarapa hari ini kadada malihatnya di langgar ataupun di gardu,” ujar Tulamak.
“Mungkin inya lagi banyak gawian di rumah jadi kada kawa bagabung wan kita, sahut Garbus.Samalam aku malihat banyak urang dirumahnya, ujar habar kadatangan kaluarganya matan Tamban,” ujar Garbus.
“Ibarat hitungan kita ini kada ganap bila kadada Palui karna inyalah tukang ganapi,” ujar Tuhirang nang hanyar datang.
“Cuba pang ikam dadangarakan atawa diilangi kalu inya garing maklumlah wayah ini musim sampar, banyak urang nang garing mariap dingin apalagi kita ini sudah mulai tuhaan kada kaya bahari lagi ujar Tulamak.
Atas anjuran kakawalannya itu maka Tuhirang mailangi rumah Palui, inya takajut banar sakalinya Palui bujur-bujur garing.
“Garingnya mulai hari Arba tadi imbah bulik matan pahumaan, jadi sudah tiga hari,” ujar bini Palui. “Mulanya, awaknya panas lalu dingin, malamnya kukuriak kaya disasahi urang.Imbah itu baisukannya kasakitan pinggang,” ujar bininya pulang.
“Kalu kaya itu kita bawa ka dukun atawa ka Puskesmas haja, kalu pina inya kapuhunan karna kutahu minggu tadi Palui bapadah ada manabang puhun jingah,” ujar Tuhirang.
Imbah mailangi Palui, Tuhirang langsung bahabar wan kakawalannya lalu bamufakat handak mambawanya ka Puskesmas.
“Lui…..ui Lui…..garing nangapa ikam, maka pina baarunuhan banar, tapi awak pina ladar haja, ujar Tulamak. Garbus nang datang tadudi badiam haja, sakali ini inya handak mambalas Palui karna rancak banar mangalahakan inya.
“Adduuhhh….. kasihannya Palui. Garing apa ikam Lui?” ujar Garbus sambil manjapai dahi Palui. “Aku tadi Lui ai ada ka rumah duktur manakunakan panyakit ikam ini, lalu duktur bapasan bila mailangi Palui jangan kada ingat mambawa tali palastik gasan maukur panjang awaknya, nyaman maulahakan tabalanya. Lalu takunakan jua apa-apa pasannya wan kakawalan, apa ada hutang atawa ada tagihan nyaman dipunahi,” ujar Garbus sambil pina sadih.
“Bus, Garbus……bujurkah Bus? Bujurkah duktur bapander kaya itu?” sahut Palui sambil maancap bapuat matan bantalnya. “Anu Bus ai….. aku asa ringkut banar ai awak, bakas bahujan samalam, mungkin kana salisma haja,” sahut Palui sambil pina manggah.
“Aaiii…. jangan bapuat abahnya ai,” ujar bini Palui.
“Aku kada garing……. aku kada garing,” sahut Palui.
Mandangar Palui pina banyaring pander, nang lainnya tatawaan sambil baucap, rupanya Palui takutan jua wan mati, ujar bubuhannya.
