Kisah Palui Manawari Banar
Palui wan kakawalannya maambil upah borongan batatabas di kantor kalurahan, napa rumputnya sudah pina tinggi-tinggi.
Tapi karna dikarubuti batiga makanya sabalum tangah hari gawian batatabasnya sudah handak tuntung.
“Imbah tuntung bagawi borongan tabasan ini, kita makanan,” ujar Tulamak.
“Ikam ini Mak ai makanan tarus nang dihatiakan,” ujar Garbus.
“Gasan nangapa duit kalu kada gasan makan, apalagi uyuh-uyuh bagawi bahaharian ini,” ujar Tulamak.
“Aku akur haja imbah bagawi ini makanan, tapi sabalumnya kita babarasih awak, baudhu lalu sembahyang. Imbah tuntung sembahyang hanyar kita bapikir makanan,” ujar Palui
“Tapi ada syaratnya, karna gawian kita ini pas-pasan upahnya maka kita ‘BSS' haja,” ujar Tulamak.
“Napa BSS itu Lui?” ujar Garbus kada paham.
“BSS artinya babayar saurangan-saurangan,” ujar Palui manjawabakan.
“Aku akur, jadi sapamilih saurang haja napa nang handak dimakan, handak nyaman bayarnya larang atawa handak nang murah-murah haja. Tasarah masing-masing,” ujar Garbus.
“Aku pasan nasi rawon, banyaki kuahnya nyaman kaina kawa batambah nasinya,” ujar Tulamak.
“Aku pasan soto wan satinya sapuluh cucuk,” ujar Palui.
“Aku pasan gado-gado haja, banyak pitaminnya,” ujar Garbus.
Wayah samunyaan sudah sadi maka bubuhannya baimbai makanan. Tulamak ancap banar mahabisakan nasi rawonnya, lalu minta batambah pulang. Garbus makannya pina lambat karna inya sakit gigi. Sedangkan Palui sabalum mamakan sotonya, inya mamakan sati, tapi nang dimakannya tunggal bilahan cuma sahiris-sahiris sati hujungnya haja, hingga tiap cucuk tasisa tiga atawa ampat hiris.
Lalu imbah tuntung mamakan sahiri-sahiris itu lalu inya mulai mamakan sotonya.
“Ayu, siapa handak sati ambillah,” ujar Palui purapura manawari Garbus wan Tulamak.
“Aku sakit gigi Lui ai kada kawa makan daging,” sahut Garbus sambil manyirit sati nang sudah pina basisa tunggal bilahan. “Ayu Mak, rasani,” ujar Palui manyuruh.
“Sabujurnya aku handak jua marasani Lui ai tapi samunyaan pinanya sudah bakas igutan ikam, samunyaan bakas muntung ikam,” ujar Tulamak.
“Ikam dasar pamalar Lui ai, kami paham haja. Ikam pupura manawari kami, tapi samunyaan sati sudah ikam iguti supaya kami kada maminta,” ujar Talamak paham.
“Maka tadi ikam jua mambawai supaya BSS alias bayar saurangan-saurangan,” ujar Palui tatawa mambulikakan panderan Tulamak.
