Pas hari pasar dasar rami tarikan maujek. Hanyar satangah hari Palui sudah lima kalian bakulih panumpang. “Dasar parajakian aku ini Bus lah, balum satangah hari aku sudah banyak dapat tarikan,” ujar Palui baagak wan kakawalannya.
“Nyata haja banyak tarikan, mun hari ini hari pasar,” ujar Garbus kada hakun kalah.”Sabujurnya kada tagantung hari Bus ai tapi tagantung nasib. Bila dilihat matan garis tanganku ini nasibku dasar kada jauh pada rajaki,” ujar Palui manampaiakan talapak tangannya.
“Jangan pina musti Lui ai, sampai mana garang kajian ikam jadi bapadah bisa mambaca nasib lewat garis tangan,” ujar Tulamak mangaramputakan panderan Palui.
“Sini aku maramal Garbus mun kada parcaya,” ujar Palui mamariksa ka talapak tangan Garbus. Ranai Garbus dipariksa Palui talapak tangannya.
“Kaya apa Lui?” ujar Garbus panasaran handak tahu.
“Amun talapak tangan ikam ni bagaris palang, artinya ikam katuju manampiling, bujurlah Bus?” ujar Palui manakuni Garbus.
“Bujur ai lui ai, aku rancak sarik lawan anakku, bila sudah muyak inya kutampiling,” ujar Garbus takajut mandangar Palui tahu inya katuju manampiling anak.”Amun kawa jangan lagi Bus ai,” ujar Palui mamadahi. “Kada baik manggaduh anak lawan kakarasan kaya itu.”
“Aku pang Lui kaya apa?” Tulamak umpat manyurung katalapak tangannya limbah marasa Palui bujur manangguh Garbus.
“Garis tangan ikam pina bacabang. Artinya garis katurunan Mak ai. Ikam itu kada mau sugih. sampai katuha tatap haja nangkaya ini,” ujar Palui mamadahi Tulamak.
“Garis katurunan kaya apa Lui?” ujar Tulamak pina sakit hati dipadahakan kada mau sugih. “Garis katurunan pang, bahwa ikam katurunan kada mau sugih. Coba ikam itihi juriat ikam matan padatuan, paninian lawan julak- julak ikam, kuitan ikam, adalah nang sugih?” ujar Palui manakuni Tulamak.
“Kadada pang nang sugihnya,” ujar Tulamak masam.” Nah, itu artinya garis katurunan ikam kada mau sugih, kaya apa handak sugih amun matan padatuan miskin barataan. Kada ada nang diwarisakan,” ujar Palui mangalakak tatawa.” “Bujur ikam jua Lui ai,” ujar Tulamak kakalahan
